بدي أنعل َنَفَسك … بدي أطالع روحك … بدي أعفسك …
واسترجي يا ابن ال …., بس استرجي …
لو فكرت بس تسترجي ها … بس تسترجي ….
بسويك ممسحة للكل … عبرة لحيوانات … ومثل للدواب
رح أراقبك كأني ظلك … واسترجي تفتح تمك بحرف
غير كلمة … نعم 
وغير من القلب مارح أرضى … ولاك
وبدك تصفق … وبحرارة كمان … وبدك ترقص … وتدبك آية … تدبك
وبدك تنخخخخخخخخخخ,  … ويا ويلك ويا نشح ليلك … لو …
لو … رفضت أو … اعترضت … ليش بتسترجي …! والله والله رح ….  
ولك بدي أغلي الأسعار كمان … بدي أولعها وأشعللا … وهَّويا … (للتلطيف).
يلي قريتوة هو خطاب من عنصر بسيط في جهاز مشهورعم يخاطب (س) بني آدام
لحظة … عفواً … صار خربطة في النشر …. هي فقرة بالأعلى
مالها علاقة بالعنوان وعفواً لنشرها … وحقكم علي …

أما الآن, فهذا كلام إقتصادي كبيـــــــــــر يتحدث عن الخطط الضريبية …
  
بدي أفرض عليك ضرايب على السكن, ولا بدك تسكن ببلاش عمووووو…!
مابكفي عم نحويك ونحميك ونوفرلك سكننننننننننننننننننن بمبلغ زهيد يا زهيد …!
و ضرايب على الأكل, ولا نجبلك العلف (الأكل) لعندك هيك ببلاش …!
شو عم نشنغل عند الخلفوك ولاك, ولا مو شايفين من شكلك …!

وضرايب على الاستهلاك والتنفس والمعيشة, لا تستغرب, (نعم أصبح الحلم حقيقة)
يا أخي المواطن صرنا متل (ضيعة عالمية), يلي بيغلى
سعرو في (أنغولا) رح نتأثر فية نحنا
لك يا عمو الله يخليك, كل شي عم يرتفع سعرو
(إلا أنت أيها المواطن, بهبوط) بس أنت شو عرفك …!
وكل شي عم يشملو التخصص (ربي يخصخصوك يا مواطن ويخلصنا منك)
وبأعتبار نحنا عالمييين قصدي من جملة هالعالم
رح نمشي وراهم, قصدي معهم بخصوص الضرايب

في ضرايب على الضرايب, هههههههههههه شبك أرتعبت
وأصفر لونك وأنخطفت واجهتك …!
عم أمزح ولوووووو شو مابتستحمل مزح …!
وكل شي أنت بتسمعو بتصدقو ….!
- ياسيدي أنتو علمتونا أنو كل كلامكم مظبوط ولازم يتصدق …!
لك صح صح بس, لحظة لوضحلك قبل ما يوقف نسلك (وتبطل يمشي حالك)
في مسودة بهالشي, تقدم فية واحد من مجلس (الكونغرس) الموقر تبعنا
بعدما (مل), لا شغلة ولا عملة غير كلمة (موافقون بالأجماع)
مع وقفة على الحيل بتدوخ الراس بعد طول جلوس على
الكرسي البنعس وبعد ما (مل) من لعب التركس على (اللابتوب) تبعو …
يا خيو (مل) العضو, عفواً (السيناتور) من كتر ما ما ما …
(لوين خيو …!)  طالع عالعاصمة (ووين رايح …!) نازل من العاصمة
وين كنت (بالعاصمة) ووين رايح (عالعاصمة) شو صارت العاصمة درب حمام …!
وبيني وبينكم (مل) من السكوت, وقرر يتحرك ويعمل شي, أي شي, لك أي شي
بس المهم يعملا ويخلص (لا تفهموني غلط …!)

معك حق, صحيح, هوة ما بيعرف يقرا ويكتب أنا معك بهالقصة 
وصحيح هوة نضرو ضعيف شي كم درجة بس, وما بشوف غير غباش بس
بس يا خيو صوتو جهوري كتير, يعني بيقدر يحكي ويصيح ويجعر
ولا تقول بياع مازوت أيام زمان على الطنبر (وهاد أضعف الإيمان)
وهاد المطلوب هتاف … هتاف … هتاف … هتاف …
حضرتو(السيناتور طبعاً) مستأجر واحد مع (الابتوب) من ولاد ضيعتو
ابن ابن ابن ابن ابن بنت عم اخو مرتو يلي هية بنت عمو كمان, على مبدأ (الأقربون أولى)
منزل علية صور من النت (لا تفهمني غلط) وشوية العاب إختبار للذكاء (إن وجد)
  
بترجم كلامو (السيناتور) لمطالب, وأفكارو لبنود
واحد تنين تلاتة …(وهي عم نتطور…!) 
وبليلة فيها ضو قمر خفيف على سطح الدار
وبعد جلسة (رومنسية) مع مرتو الرابعة (بنت عمو طبعا) و (نفس مبدأ الأقربون)
فكر … فكر … فكر … (أمر غير إعتيادي بالمرة) وجاهد بالتفكير … وجاهد
وقاتل سلطان النوم بصعوبة … وغلبو, وطلع معو …
طلع معو هالأكتشاف الرهيب (ضرايب على الضرايب) وااااااااااو
بس الحمد لله, المكسب أنو شغل مخو الملفوف بكيس خيش
لأول مرة في حياتو (الضيعجية) عفواً السياسية….تصور …!

في ضرايب أنا مقترحهم كمشروع قرار يلزم الجميع (إلا الشباب الطيبة)
عد على أيديك التنتين تشوف …
ضرايب مؤقتة
وضرايب إستثنائية
وضرايب فوق العادة
وضرايب من تحت السرة
وضرايب موسمية
وضرايب رفاهية وكماليات
وضرايب بزخ وترف
وضرايب استهلاك ومواصلات (سرافيس وباصات)
وضرايب خدمة العلم (قريبا)
وضرايب الملابس الجديدة
وضرايب على الطبابة طول العام
وضرايب زيارات والسهرات
وضرايب الجلوس في مطاعم
وضرايب الموبايلات

ولسة عملتلك (ضرايب) عفواً عقوبات على قانون السير
شي على كيف كيفك, آية (الملاك) لو ساق سيارتو رح يتخالف مافي مجال
بكل بساطة تجاوز إشارة غرامة 25000 وحبس, آية حبس
لا تستغرب ولاتصفن بوشي, ولمدة شهر أو شهرين حبس
طبعاً مع شرشحة وموالح مشكلة من البهدلة والذل والإذدراء
وبتعرف الكمالة أكتر مني …
آية قسماً بالله رح خلي الشعب يصف سيراتو ويمشي على رجلية
وهي ذقني إذا ما بخليهم يندمو لأني فكروا يشترو سيارات 
قال فرحوا على حالهم اشتروا سيارات قال …هه … !
حسبوا حالهم صارو بشررررر ….! آية فشرررررر ….!

ولسة عم فكر أعمل ضرايب على … على … (ليلة الخميس تبعك) …
ولا قلك …. أنت كل أيامك خميس (يا ملعون) مشان هيك رح أركب عداد
على غرفة النوم مشان راقب كم مرة  دخلت وطلعت, وكم مرة …. نمت

وبدي أعمل ضرايب على المصاري يلي معك (إذا بقي معك شي)
وضرايب على المشاوير يلي عم تعملهم مع (صاحباتك) أو مع عيلتك مو فارقة
وضرايب على الكلام والعلك بلا فائدة (إلا الهتافات)
يا أخي أنتو شعب كرار ماخرجو غير يحكي
ياريت تشتغلو (عنا) عفواً لوطنكم قد ما بتحكو وبتعلكو …!
 
وبدي أعمل ضرايب على الولاد, يعني كل واحد رح يجيب
ولد رح يدفع علية ضريبة عشرة بالمية عن كل ماليتو (إذا بقي عندو)
وإذا بيجيب توأم, بيدفع دبل, لأن مو فارقة كم بطن جابت مرتو, المهم بكم ولد ابتلينا 

ولسة في ضرايب جديدة عم فكر فيها, ويمكن آخد
عليها درجة الدكتوراة في (الاقتصاد الضريبي المذل)
النظرية هية (الضريبة الإنسانية) بمعني, أنت أيها المواطن (الانسان) بين قوسين
كونك الله خلقك مو نحن, (حتى إشعار آخر)
وسواك بني آدم وكرمك عن الحيوانات (شكليلاً)
رح تدفع ضريبة وهي الضريبة الإنسانية
بمعنى عم تدفع كونك إنسان مو حيوان, لأن لو كنت حيوان (ياريت والله)
كنت ما أكلت وشربت وانبسطتت (باليالي وعلى الدش …!)
وعشت حياة الرغد والترف والبزخ والبحبوحة في وطنك الحنون وكلفت الدولة
مصاريييييييييييف حياتك من أول ما نزلت, لبين ما
ما تكاثرت وشرشت وصرت جدو …!

- عفوا بس أنا لسة ما اتجوزت …!
- يعني بالمستقبل إلا ما تتجوز مو بلا, آية رح تتجوز أكييييد …!
- والله مو مبين رح أتجوز ياسيدي, قصدي حسب هالضرايب
الظاهر يا دوب يادوب, آكل وأشرب وأدفع ضرايبي وأنام بسلام
- بس بالأخير رح تتجوز حتى لو صار عمرك خمسين سنة مافي كلام 
صح ولا لأ …! جاوبني بس …!
جاوبني صح ولا لأ, …. لك لا تضل متنح متل الحمار عم تهز راسك ….
جاوبني بصراحة ولا تخاف مارح أعملك شي, أنا هون انسان مدني مو أمني

- سيدي ممكن سؤال لو سمحت …!
- تفضل اتبوجئ علينا بأسئلتك السخيفة, بس تقاطعني, أمنيتك تقاطعني, روح قلبك تقاطعني 
- عفوا بس لو بدي أطلع جواز سفر واهج على أندونيسيا أشتغل أندنوسي قصدي (شغالة) هنيك
رح تاخدوا مني ضرايب يا ترى ….!

- أوووووووووف والله فكرة, ضرايب العمالة في الخارج
أوووووووووف والله فكرة بنت كلب شلون ماخطرتلي …!
- لأ الفكرة عادية كتير بس أنت, أنت شو رأيك ممكن
تعملوهـــــــــــــــــــــــــــــــا …!

والله لو أقتضت المصلحة القومية للشعب الكادح …
ليش لأ مافي شي مستحيل عنا, كل شي وارد
وكل شي ممكن, بس أنت حط أيديك ورجليك بمي بـــــــــــاردة ولاتاكل هم

الى هنا إنتهى الحوار بين مواطن مسحوق (س) مع شخصية مهمة جداً جداً
في جمهورية ضرايبــــــــــــــــــــــستان بجنوب إفريقيا