الأول: لك شفتوا الأوبريت العربي, على قناة زووم …!

الثاني: أيــــــــة شفتو بـــــــــــــايخ كتير وممل وشرشوح

الأول: شو بايخ يا زلمة …!

الثاني: مناظر عادية … عادية جداً مافي شي مرعب أو بخوف

(بينما يتجاذبان طرف الأوبريت مرت فتاة من جنبهما لم يلحظها الأول)

الثاني: ولــــــــــــي على هالعيون, دمــــــــــار, عذاب, موت أحمر

لو عيونك جهنم …! أنا أول مين يدخل ولا يطلع أبداً

الأول: وبالله منظر المرة يلي عم يعضها الكلب مو مؤلم …!

الثاني: ليش الكذب, مؤلم, ومؤلـــــــــــم جداً كمان

خاصة الجسم السمباتيك يا خيو تقول شاشة (ال سي دي) …!

الأول: يمكن بشاشة (ال سي دي) تبعك عم تشوف الصورة

أكبر وأوضح …! امتى رح نحس بالوجع العربي …!

الثاني: لأ وأنت الصادق امتى رح يحس هوة فينا…!

الله وكيلك صرلي عم أستناة من ساعة لبين طل وظهر

الأول: يازلمة صاروا يحطوا مواعيد إذاعة الأوبريت تصور …!

الثاني: أنا حافظ كل مواعيدو متل هالوقت تماماً, بيطلع وبيحرق قلبي

الأول: أنا بعرف غير هالوقت …! يعني غيروا التوقيت …!

الثاني: أغلب الظن …. أية

الأول: بس أكتر شي وجعني وقت الفلسطيني مدري العراقي

عم يركض ويصوبو على ….. النار.

الثاني: صح صح, لك هاد أحلى منطقة بحبا ….. وشوف مشيتو

ويالطيف وقت بيركض …! يا خيو تقول هيك متل الغزال الرشيق

شي مقدمات, تقول صواريخ كاتيوشا, وشي مؤخرات جبارة تقول …

الأول: يا خيو مابقا حدا لحد بالأيام, ومابقا حدا يسأل غير على حالو

الثاني: لك أنـــــــاني من طول عمرو أناني, مابحب غير حالو

مغـــــــــرور, بس المشكلة يلي عم تعذبني أني بحــــــــــــــــــــــبو

مـــــــــوت والله بحبو.

الأول: شعور حلو ووطني منك, والله وقف شعر راسي من كلامك 

بس شو نعمل هيك مقدر علينا

الثاني: صدقت كل ما بشوفو بيوقف … بيوقف … شعر راسي أنا كمان

بس مقدر علينا نشم ولا ندوق, هيك حظي من طول عمرو جــــــــــفاف

حياتي تحولت لعــــــــــــــذاب.

الأول: يازلمة تصور أنا ابن أختي الصغير وقت شاف الأوبريت صار يبكي

وهوة مو فهمان شي عمرو يا دوب أربع سنين بس, تصور …!

الثاني: وأنا والله وأنا, وقت بشوفو مطنشني ومو سائل علي بتهرلي

شي تلات أربع دمعات على ظلم أهمالو الدابحني.

الأول: حسبي الله ونعم الوكيل صرنا شعب الفديو كليبات التافهه الفاضية

الثاني: مظبوط (أو ما غاد) صرنا شعب بيتفرج على الفديو كليبات البتهز البدن

يلي مابيتجيب غير حرق الأعصاب وفوران الدم, وياريت على شي مليان

بتتفرج وتتفرج وبتفور وبتغلي وبالأخير ….. على شي فاضي يا خسارة.