نظر الي والندم حالة ثم أخذت عيناة بأستجرار

الدمع ليتجمع خلف سد, وفجأة إنكسر السد ليبلل

وجهه بالدموع …. إنها دموع الندم والألم

الآن فقط شعر أنة قد أتى على أمراً عظيماً

يحاول بكاء غلطتة علها تحرك في مشاعري المشاعر

والأحاسيس, والإشفاق وعلها أيضا تؤثر فيَّ

وفي بضع كلمات مبهمة تجرعها وأعترف

أنا غلطت بحقكم … سامحوني.

 

الى هنا وينتهي الحلم, ثلاث أحلام من هذا القبيل

قد هطلت على اللاوعي الداخلي لداخلي في منامي

 

أضغاث أحلام مؤكد أنها أضغاث من بعض الأحلام

ولكن لماذا أنا بالذات …!

ظل هذا التعليل راسياً على ضفاف مخيلتي الضحلة

 

ثلاثة أحلام في فترات متقطعة ولكن نفس المغزى

نفس الحجة, نفس الخطأ, يعترف بة كل من الأثنين

وكل على حدا

 

الحقيقة جلية ساطعة كشمس نهارنا هذا, لا يزوغ عنها إلا زائغ

والجرم قد لبسوا قميصة وربطوا عقدة الكرفات بأحكام

وخنقوا الحق … علهم يقتلوة, ولكنهم لا يدرون

أننا سنتقابل آجلا لا محال, عند أعدل القضاة, عند أحكم الحاكمين

ولكن لماذا أنا بالذات …!

 

مخلص عملية(السطو المسلح بالنفاق) ودون الدخول

في تفاصيل تجعلكم في حالة ملل (وخوفا على سلامة ما بقي لي من قليل عقل)

أخبركم أن هناك شخصين (الأول خبث, والثاني خبائث)

من أصل ستة أفراد من أرحامنا وأقاربنا (المحترمين … تهكماً)

قد أنكروا لنا حق قد شرعة الله تعالى لنا وهو الأرث (يا طويل العمر)

وهذة عينة واحدة فقط عن بعض الحجج الواهية (مثلة)

التي سلقنا بها كبيرهم ومثقفهم (وش السحارة … بالحلبي)

 

هو دكتور (وانا بدلعو دك) أجترحت حديثة لأنة صدمني حقاً (فوتني بالحيط)

 

وكأنة يلقي محاضرة على طلابة الأغرار, هدوء كلامة كلة هدوء وثقة   

أولاً: أنتو بسورية (مفكر حالو أميركي الأخ) مافي عندكم تحكيم الشريعة (قديمة كتير دك)

يعني أنتو مو متل السعودية يلي بتطبق الشرع, يعني هون دولة

علمانية وقوانينها وضعية, وما بتلزم حدا بالشريعة (معروفة جداً وبايخة أختصر)

 

تانياً: أبوي الله يرحمو (تعيش بس أختصر) سوري و معو الجنسية اللبنانية

(شكلك بس أنت لي بتعرف هالسر الفظيع …!)

طبعاً وطبقاً لهل كلام لا تنطبق علية القوانين السورية (أوف شلون بقا زبطت معك …!)

 

تعقيب صغير على كلامو

(أنا عندي سؤال, لو واحد كان عايش في دولة كفار, والأسلام مو مطبق

هل بيمنعو هالأمر أنو ما يصلي …! أو يزكي …! أو يتصدق …! (الجواب معروف)

طيب والأرث شو وضعووووو يا ترى….!

طيب منين جاب دكتورنا القوانين والعلاك الفاضي …!) إنتهى التعقيب

 

تالتاً: أنا رجل ميسور (الله يزيدك من نعيمو) يعني بيجيني بالشهر 20 ألف دولار

وبالسنة بيجيني 300 ألف دولار (خمسة وخميسة … كمل)

يعني أنا مو بحاجة هالمصاري (طيب خود حقك وهات حقي يا أخي …!)

بس خير والله بعتوا أقول لأ …! (أعوذ بالله, قول نعم وألف نعم وللأبد)

 

نحن:

طيب سمعنا أنو ترك المرحوم مبلغ مليون دولا لكل فرد مننا

بالإضافة الى أراضي كتيرة في بيروت بمنطقة الناعمة الحساسة كتير 

 

الدك:

كأنة قد شرب شطة فلفل حار جداً, أصبح وجهه أحمراً كالكتشب

مين قلكم ….! (ولو نحنا عرفنا بالمؤامرة دك)

وبعد شد وجذب, وبعد الأخد والرد, والحصار النفسي, وجهاز كشف الكذب

وبعد الترغيب والترهيب (بالإثم طبعاً) وشرح الأدلة والأحاديث الي بتبين

سوء فعلتة وقباحتة, إعترف و كأنة يقطع آخر صلة تربطة بنا

 

صح صح كلامكم, مفهوم وصح وللعلم (كأن عم يجاكرنا) قيمة الأراضي

ببيروت (وكأن عم يسحب موال) أكبر بكتــــــــــــــير من قيمة المصاري (يافرحتي)

بس هيك كانت رؤية أبانا الله يرحمو, يعني أنتو مالكم شي (أنا روح قلبي الرؤى والتكتيك تبعك يا دك)

 

نحن:

طيب ممكن تورينا الوصية …! (حق, يعني المحكوم بالأعدام لازم يشوف التوقيع على الحكم حقو يا جماعة)

طيب أنا بعطيكم نسخة عن الوصية بس بعدين, بعدين (ووينك يا بعدين امتى رح تجي بالسلامة الله أعلم …!)

 

وأنتظرنا ذلك (البعدين) ولكنة لم يظهر, ولن يظهر أبداً لماذا …!

(لأن دك كان بعاصمة لبنان يتفقد الهبرة الكبيرة, ويعمل زيارة حميمة للبنك بتاعو)

لأنها غير موجووووووووودة, لا يوجد وصية تذكر, من حق المحروم (الوارث أقصد)

كما من حق الوارث أن يقرأ ويطلع على حكم الصادر من الجهه الآمرة (سوا …! تمام هيك …!)

ولكن لا وصية لوارث (حديث شريف) عفواً لا وصية أبداًً لكم (طبق أول الجملة فقط من الحديث…!)

 

الحوار مع الدك (الدكتور متل ما بدلعو بالأميركي) نقلتة حرفياً, (وللأمانة ما كان حرفي بحت نص بجت), لأنني عملت رقابة وحذفت كل الشتااااااااااااائم من ثغرة العذب, وحذفت كل المسباااااااااااااااات التي رشقنا بها.   

وللعلم أنة من أشهر الدكاترة في المنطقة العربية والشرق الأوسط, رئيس قسم جراحة في أحسن المستشفيات(اللهم لا حسد ولا ديقة عين)

تصوروا هل هذة حجة تليق بطبيب مثقف قد تخرج من أمريكا …! (أمريكا يا حبيبتي …!)

 

يا سبحان الله كم أنت طماع يا (دك) …!

جاة ومنصب ومسؤولين بيتمنو رضاة, ومال مابتاكلو النيران ولسة بدك كمان (هل من مزيد …!)

ياربي سبحانك كم الانسان حقير, كم الانسان وضيع …! (أمثالو فقط وما أكترهم)

*وتأكلون التراث أكل لما وتحبون المال حباً جماً*

 

(الدك):

بعصبية حادة كأنة ينثر الملح في عيوننا قال:

أصلاً أنتو بتحسدوني, آية نعم بتحسدوني (خسئت)

إسمحولي هون أضحك هههههههههه فعلاً يستحق

الضحك مثير للشفقة, مسكين جدا هالجاهل بليد

 

أنا بروح وبسافر وبتنعم ومرتاح وناجح ومشهور

(بس عم تاكل مال حرام وحق غيرك, وتطعميها لأولادك)

  

نحن: على بال مين أنت ….! ولا مين سائل عليك أصلاً …! أن رحت ولا عمرك مارحت

وعقولك بتروح وبتسافر وبتصرف بس نفسيتك شحيحة, ومو شبعانة

كل هالمال يلي عندك ولسة جاي تاكل مال أخوانك, العين شحيحة

والقلب دنئ …روح روح …. أنت لو صرت متل قاروون بتضل

حشيح النفس والوجدان …. إنتهت زفة العريس القبيح الى مثواة

 

بتعرفوا شو أكتر شي وجعني في الموضوع (عفواً السطو) …!

مو المصاري لا والله, …. الجرح المعنوي أكبر وأعمق, وتأثيرة أوجع

بس في شي أكبر, متل متل, أنك مفكر واحد عملاق وبيطلع (خروء)

بتحسبو رجال وبلأخير بيطلع (كلمة عيب)

وبتكتشف أنو عبارة عن وهم, عن كذب, كلو تمثيل بتمثيل, بالفعل هوة

ممثل محترف, ومنحرف (بس هي فرصة وأنكشف على حقيقتو)

 

صرت حاكي حالي (أول الفلم العربي البايخ) مو معقول أنت

الدكتور المشهور يلي عندو مزايا الأمراء وأخلاق النبلاء

يلي وقت بيحكي بيهمس همس, يطلع منك كل هاد …!

أنت كنت بمثابة قدوة الي, (طلعت حدوة, لحمار أجرب)

مافي شك أنك عبقري في الطب (بس متل العبقري في الطب

وغشاش, مافي منو أمان أو خير)

ومافي شك أنو أخلاقك الأجتماعية كانت(فعل ماضي ناقص … فعلاً ناقص)

رفيعة جداً ومعاملتك كانت جيدة بأمتياز (وببصم عليها بالعشرة)

بس وقع التمثال, وإنكسرت الأسطورة, وهاد يلي دبحني سقوط

العراب (مو تبع نيشان) سقوط المعلم (يا حرام بس, يا حيف بس)

 

أنا مو زعلان عالمصاري, المال بيروح وبيجي, والرزاق هو الله عز وجل

ومو أنت (أكيد) أنا والحمد لله أتقلب في أنعم الله, وبالحلال مو غيرو(بفضل الله وكرمة)

بس أنا بتسائل هل قطع صلة الرحم عندك يا (دك بيك) بهالسهولة و البساطة…!

مشان مصاري ….! معقول …! (شو تركت للفقرا ليعملوة …!)

كسبت مصاري الدنيا كلها وخسرت أهلك, وأقربائك, شو أستفدت …! (قلي بالذمة)

كيف عم تقدر تحط راسك عالمخدة قبل النوم …! (غريب)

كيف عم تقدر تنام …! (عجيب)

ضميرك بأي مخدر حقنتو …! (لو في ضمير أصلاً)

وقت بتمرض شو بتدعي …! بتقول يا رب …! (بصدق ولا مع شوية بهار وكذب …!)

الظلم يوم القيامة ظلمات يا (دك أفندي), ظلمات صدقني

 

ثلاث أحلام زارتني في المنام, وحدثتني عن ضمائركم العفنة ولكن الكبر يسحركم بسلطانة

تصوروا ثلاث أحلام أجتني وأنا الي أكلولو حقوقو …!

طيب ليــــــــــــــش ….! طيب كيــــــــــــــــــــف ….!

أنتو بتقدروا تنامو بالليل …!

هل يا ترى بيجيكم أحلام …!

ولا هل يا ترى بجيكم كوابيس …!

وين الضمير يا دكتور ولا هاد مادرستو في علم الطب والتشريح …!

 

بحب قلك بالنهاية تمتع (بمالي) على كيفك, والله لا يسامحك دنيا وآخرة

وإنشالله تصرفهم عالحكما (دعاء شعبي قديم)

وبيجي يوم توقف فية, يوم القيامة وتعترف وتقول عن يلي

معو جنسيتين شو حكم التوريث فية … وأنو بيطبقوا الشريعة ولا لآ …!

 

(الدك) يطلق رصاصة الإعدام:

أنا ما بقالي علاقة فيكم أبداً أبداً, لبقا تشوفوني ولا بقا تسلمو علي

ولا على مرتي, ولا على ولادي, خلص إعتبروا كل شي بيننا إنتهى (ضربني وبكا و…)

وأنا بقلو بدوري صحيح طلعت اسم على مسمى, وفعلاًً كل شي إنتهى وهي نقطة.

 

ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج  |   دوّن الإدراج