إغتيال ….. وزير
كتبهايزن حلب ، في 20 شباط 2008 الساعة: 14:48 م
إن أحداث هذة الجريمة الإرهابية لا تمت للواقع بصلة فهي
من محض الهلوسة فالكاتب كتبها وهو يشرب ……(الكولا طبعاً)
وأي تشابة فهو من محض المحض لمحض للصدفة
ا ل غ ي ر م ق ص و د ة
جلس الإثنان بطرف خفي ومظلم من شرفة قهوة قديمة متهالكة, ومتأكلة الطاولات والكراسي
تطل على مكان أمني مهم و حساس جداً, من بلد عربي يفترض أن يكون شقيق
كان كل منهما يحمل جينات الفقر والعوز والحاجة و…… (الى آخر مشتقاتها)
فالأول سائق وزير 60 عام, من داء الفقر العضال الذي استشرى في كل أفراد عائلتة
والثاني موظف 58 عام, من الديون و الهروب والتقتير والإستدانة والهروب …الخ … الخ
يعمل في أرشيف دائرة حكومية مسترطب وعفن يحوي من الكائنات القارضة الكثير
"مو موضوعنا بس للأيضاح"
أحيانا ينظر إليهم (القوارض أقصد) بتحسر ويتمنى أن يكون مثلهم
ويتمتم بتسليم….. قدر الله وما شاء فعل
"خلص الإيضاح التافة, و بديت المؤامرة الأتفة"
الأول: " لهون وحاج بقا لأيمتى بدي أتحمل هالحالة مابقى أقدر
ما بقـــــا اقــــــــدر أبداً أبداً, لك لغينا الفطور من حياتنا وما خلصنا
والعشى يا سيدي عم نطنشو آيه وبعدا, لأيمتا رح نضل صايمين …!
يخرب بيتك يلي ببالي بـــــــــــس
لك شايف شايف … يا لطيف على هالجمعة شو كتيرة …!
شكلو هالوزير رح يجنني ويجبلي السكتة القلبية من كتر ما بيتحرك
و بيصرف وبيبزر والله الأكل يلي بيكبوة الخدم
بيوم بكفينا طول جمعة وهي عم أحلفلك
الله ياخدك يلي ببالي بــــــــــــس
وصـــــــــــــــــــــــــــــــــــــــــاح
أبو صطيـــــــــــــــف تنين شاي وأركيلة تنباك عجمي بعد أمرك بس بسرعة عندي مهمة
يا زلمة شوف … شوف كم واحد معو وعم يحرسو …!
كل هاد خايف على حالو …. أنا خايف آخر يوم أخلص علية من قهري
الثاني:" عيني تحرسو, ههههههه خير خير لية شو مشكلتك معو بالضبط…!
كلما بشوفك بتحكيلي علية حكايا وقصص خرافية, عن سفراتو وروحاتو جياتو
تركت الدنيا الفسيحة, ورقعة الحياة الواسعة
وركضت وراة تتبع أخبارو وتحركاتو, شومافي غيرو مهم برأيك …!
الأول:" يا خيو مافي شي بدي أساوية, إلا بيطلعلي
بأعتراض شكل أو بعرقلة شكل, خلاصة الحكي
كل شي بدو تمن, حتى هالقعدة المملة معك بلأخير
رح تدفع تمنا, ومن حسابك الخاص كمان لأشوف, لأني صار دورك بقا
من طول عمري بتروح علي, حركلي حالك وخليك أبضاي ليوم واحد بس
لـــــــــــك آاااخ كل شي غلط بغلط, وكل شي ناقص, وكل شي مثلي …!
الثاني:" دخلك شو يعني متلي هي مافهمتا …؟
الأول:" لا تفهمني غلط ولو, بعيد الشر عنو شو
سوي و أفندي و مو متلي ولا متلك
متلي يا معلم يعني, شبية الشيئ بس ما هوة, يعني مو أصلي بالأصح
الثاني:" كمان مافهمت, قربلي ياها لعقلي بتعرفني عايش بالأرشيف
و مابفهم هالمصطلحات الفلكلو سياسية يلي بتسمعا أنت من الدوش"
الأول:"يا صديقي الغشيم دائماً وأبداً, النظرية المتلية صارت
شائعة كتير في بلدنا المفجوع, يعني مثلاًً
نحنا عنا متل الشوارع … ها متل الشوارع, بس مو شوارع, متل العالم
وعنا متل التعليم … ها متل التعليم, بس مو تعليم حقيقي
وعنا متل الأنظمة … ها متل الأنظمة, بس مو نظام حقيقي الواحد
بيطبقو وبيحترمو
وعنا متل خدمة العلم … ها متل خدمة, العلم بس مو خدمة علم.
يعني شوف هداك المجند يلي قدامك, بدقيقة بطير, مالو قيمة يا حرام
وقيس كل شي بتشوفة ببلدنا بلد الفقراء وعائلاتهم فقط, بآة يا نيالي ولالي لالي
وأنت بدورك طبق هالنظرية المتلية يا مثلي أفندي على حبايبك
ولك حتى هالوزير حسب النظرة المتلية مو وزير حقيقي, ولا تسألني شلون
بلأخير رح تعرف لحالك.
الثاني:" والله شكلك عم تعاني كتير من هالوزير أسود الوش والبدلة والقلب
لك ليش نيقم علية كل هاد فهمني, شو أكلك مالك, وشرد أهلك …!
كل ماهنالك أنو في ناس بتحب تهدية مصاري وعقارات وغيرو
الأول:" يازلمة يمكن صارعندو كذا مليون دولار وفلل بتسكن
نص شباب البلد المشردين, تقول ورت من طلال مصراتو …!
ولك وين بدو يروح بهالمصاري بس مابعرف…!
يعني ما بمل من كترة المصاري الي بحاساباتو ببنوك برة …!
لك والله عبأ علية, مثلاً أنا وقت بيصير معي مثلاً500 ليرة
بمل منا بجيبي وحيدة حزينة, بقوم بصرفا مشان
ما أعذبا بالإنفرادي بزنزانة جيبي, ومشان تصير حرة طليقة
لأن أنا ما بحب السجون ولا السجانين
يعني أنا مو سادي مصاري, ولا عندي حب لطش مصرات الغير
عالطالعة والنازلة, صحي أنا منوف و مجنط, بس الله وكيلك شريف
بس بدي أفهم شغلة ما عم أستوعبا
لك كني هاد ما بيزكي طاول …!
ولا يتبرع بشي لوجة الله …!
ولا حتى لوجة المواطن … الي ساواة ملتي مليونير …!
الثاني:" أقلك الصدق وأنا هداك الوزير ….. الفلاني أبيض الشعر والوش
والبدلة عقدني يا زلمة مابقا يموت, لك شقد صرلي صابر علية
وعم أرسملو خطط محكمة وأحاصرو بس عبس ماكان يموت, لك شو أعلمو …!
الأول: " مستحيــــــــــل هههههههه الشغلة هيك يموت بسهولة وقت البدك أنت …!
ولك هاد بمعيتي و الله حامية, ماصدق على ربو أنو صار بمكانو وقعد علية …!
بس أنت شفتلي هاد الدب يلي واقف معو
الثاني:" على مين قصدك …! أي منن …!
الأول:" لك هاد ولو, عاليمين يلي منظرو متل الفيل من سمنو ومن كتر مالهف
لا يغرك منظرو الغبي جداً, بس ترى واحد واصل تمام, ومفيد
يعني مافي شي بيصعب على شواربو, أصلاً هوة يلي بيساعد
الوزير ومع زلمو وبدي جارداتو ومجندينو
الأول:" بس بتراهن خرجي أطيرو وبضربة أصيبو … وأجيب أجلو …!
الثاني:" أنت …! ههه بعد كل هالمحاضرة عنو وعن مواهبو الجبارة
جاي تقلي بقدر أطيرو …!
بس شلون لك خيو, مابتركب معي …!
الأول:" طيب شوفو من عندك وقف قريب, شايفو منيح أنت …!
الثاني:" أية نعم شايفو …. شو بتقدر تعملو …!
الأول:" أنت بتعرف مسدسي الحربي أبو 9 ملم يلي عطوني ياة …!
طيب بتتحداني أني بقدر أغتالو من دون ما حدا يوقفني أو يحس…!
الثاني: ههه جنيت أنت ولا أنهبلت من جديد …!
الأول: طيب أنا قبلت التحدي, بس بطلب منك
تضبط اعصابك, ماشي, وصلي على النبي
خود نفس عميق شوي ولا تزفر, وحد الله
لا تستغرب أبداً لو صار شي مو متوقع
وإياك تقول لحدا علي رح تشوفو هلق
هي أسمى عملية قنص بسلاح حربي أسمو (دراجيغانوفا) موديل 88
وبدقة متناهية ومن دون ليزر بس شوية تركيز عالهدف الثابت
تعلمت هالحركات من الروس وقت التدريبات الي عملتا هنيك
بس أعد للتلاتة, بتشوف القنص على حقيقتو وبتهرب فوراً من وشي
حفظا هي أسما وضعية الرمي نحو الهدف بوضعية الثبات.
شوفني … شوفني … واحد … تنين … تلا … تلا … تلاتة
كــــــــــــــــــــــــــــــــــــــــــــــــــــــــــــــــــــــــــــــــــــش وزير
الأول:" هههههههههه غلبتك يا غشيم, هي تاني مرة بغلبك عالوزير بس
روح تعلم تلعب شطرنج كويس وبعدا تعى إتحداني
لك أنا ملك اللعبة يا غشيم صرلي عم ألعبا بروسيا أربع سنوات
الثاني:" لك آية والله, يخرب بيتك شقدك لعييب
هلكني هالوزير أبيض الشعر والوش والبدلة وماكان يموت
وشكلو مارح يموت إلا بعملية قنص متل يلي عملتا
مع الوزير أسود الوش تبعي
الأول: أية عن أذنك بقي خمس دقايق وبيجي سيادة الوزير, ولازم أكون بالسيارة
بوضعية الإستعداد, ســــــــــــــــــــــــلام يا خسران
والله لا يوفقك يلي ببالي بـــــــس.
ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج | دوّن الإدراج
فبراير 20th, 2008 at 20 فبراير 2008 5:20 م
هههههههههههههههههه ملعوبة
فبراير 20th, 2008 at 20 فبراير 2008 11:32 م
أحيانا ينظر إليهم (القوارض أقصد) بتحسر ويتمنى أن يكون مثلهم
ويتمتم بتسليم….. قدر الله وما شاء فعل
ههههههههه حلوة هي
فبراير 21st, 2008 at 21 فبراير 2008 11:24 ص
شو بدنا بالسياسة عمي يزن ؟؟؟؟؟؟؟؟؟؟؟؟؟؟؟؟؟؟؟؟؟؟؟
فبراير 21st, 2008 at 21 فبراير 2008 10:34 م
يا هلا بالكل ……..
بس هي مو سياسة هي شطرنج ههههههههه
شكرا الكم